​ភ្នំពេញ ​៖ ក្នុង​សង្កាត់​ស្ទឹងមានជ័យ​ទី​៣​ ខណ្ឌ​មានជ័យ មានករណីកាប់ប្លន់ទៀតហើយ ដោយជនរងគ្រោះជាយុវជនចំនួន​៣នាក់​ បានជិះ​ម៉ូតូ​ចេញ​ពី​ផ្ទះ​ គោលបំណង​ទៅ​លេង​ក្លឹប​កំសាន្ត​ ត្រូវ​ជនសង្ស័យ​ មួយ​ក្រុម​មក​ធ្វើ​សកម្មភាព​ កាប់​​ប្លន់​យក​ម៉ូតូ​បានសំរេច ហើយគេចខ្លួនដោយសុវត្ថិភាព កាលពី​​ម៉ោង​៨និង​២០នាទីយប់​ ថ្ងៃ​ទី​១៥​ ខែ​ឧសភា​ ឆ្នាំ​២០២២​ ជិត​​ក្រសួង​កិច្ចការ​នារី​ ស្ថិតនៅលើផ្លូវ​៣០ម៉ែត្រ​ ស្ថិត​ក្នុង​សង្កាត់​ស្ទឹងមានជ័យ​ទី​៣​ ខណ្ឌ​មានជ័យ​។

ជន​រងគ្រោះជាម្ចាស់​ម៉ូតូ​​មាន​ឈ្មោះ​ តេន​ ជីហៅ​ ភេទប្រុស​ អាយុ​១៩ឆ្នាំ​ មុខរបរ​ជាង​តុទូ​ ស្នាក់នៅ​ម្តុំ​ផ្សារ​ទួល​ពង្រ​ សង្កាត់​ចោម​ចៅ​១​ ខណ្ឌ​ពោធិ​សែន​។ ចំណែក​២នាក់​ទៀត​មិន​បាន​អោយ​ស្គាល់​អត្តសញ្ញាណ​។

ម៉ូតូ​ដែលជន​សង្ស័យ​ប្លន់​យក​ទៅម៉ាក​ ស៊ុយ​សុគីនិច​ ពណ៌​ស​ ពាក់​ស្លាក​លេខ​ ស្វាយរៀង​ 1K-2211។

តាម​ការ​រៀប​រាប់​របស់​ជនរងគ្រោះ​ បាន​អោយ​ដឹង​ថា​ មុន​ពេល​កើតហេតុ​ ពួកគាត់​មានគ្នា​៣នាក់​ បានជិះ​ម៉ូតូ​ម៉ាក​ ស៊ុយ​ស៊ុ​គី​និច​ ពណ៌ស​ ចេញ​ពី​ចំការ​ដូង​ ខណ្ឌ​ដង្កោ​ ហើយ​គោលបំណង​ ទៅ​លេង​នៅ​ក្លឹប​កម្សាន្ត​មួយ​កន្លែង​ នៅ​ខណ្ឌ​សែន​សុខ​ ដោយ​ជិះ​ធ្វើ​ដំណើរ​តាម​ បណ្ដោយ​ផ្លូវ​ ៣០ម៉ែត្រ​ ក្នុង​ទិសដៅ​ពី​ត្បូង​ទៅ​ជើង​ លុះ​មក​ដល់​កើតហេតុ​ ក៏ស្រាប់​តែ​ជន​សង្ស័យ​មួយ​ក្រុម​ មាន​គ្នា​ជិត​១០នាក់​ បានជិះ​៥គ្រឿង​មិន​ចាំ​ម៉ាក​ បានមក​ធ្វើ​សកម្មភាព​ ដាក់​កាប់​គំរាម​ប្លន់​យក​ម៉ូតូ​ ហើយ​ពេលនេះ​ពួក​គេ​ ភ័យ​ស្លន់ស្លោ​ ក៏ផ្តួល​ម៉ូតូ​ចោល​នាំគ្នា​រត់​គេច​ ស្រាប់តែ​បក្សពួក​ជនសង្ស័យ​ទាំង​នោះ​ បាននាំ​គ្នា​ មក​លើក​យក​ម៉ូតូ​របស់​ពួកគេ​ជិះ​រត់​គេច​ខ្លួន​បាន​អស់​តែ​ម្ដង​ទៅ​។

​ក្រោយ​ពេល​កើតហេតុ​ ជនរងគ្រោះ​បាន​មកដាក់​ពាក្យ​បណ្ដឹង​នៅ​ប៉ុស្តិ៍​នគរបាល​រដ្ឋបាល​ស្ទឹងមានជ័យ​ទី​៣​ ដើម្បី​អោយ​សមត្ថកិច្ច​ជួយ​ស្រាវជ្រាវ​រក​ជនសង្ស័យ​និង​ម៉ូតូ​របស់​គាត់​មក​វិញ​ផង​ដែរ​៕

LEAVE A REPLY

Please enter your comment!
Please enter your name here